زي ماقلتلكم قبل كده كلمة متقطع معناها ان العين مش حوله على طول .. يعني ساعات تبقى حادفة لبره وساعات ما يكونش فيه أي حول
عايز أكرر تاني أهم المعلومات الطبية عن الحول الوحشي المتقطع وعايز كل الأمهات يعرفوها لأن فيها اجابات على كل اسئلتهم عن نوع الحول ده :
" هو الحول المتقطع ممكن يضعف العين ويعمل كسل ؟ "
العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي خالص عشان كده نظرها مش بيضعف زي مابيحصل في أنواع الحول التانية اللي العين فيها ما بتتعدلش .. الولاد اللي عندهم حول متقطع بيكبروا ونلاقي نظرهم ستة على ستة .. الحول المتقطع مش ممكن يعمل كسل زي انواع الحول التانية ..
" طيب ليه نعمل عملية مادام الحول ده مش هيأثر على النظر ؟ "
رغم اني فعلاً بأقول الكلام ده لكل الامهات وان الحول المؤقت ده ملوش أي ضرر الا ان مافيش أم بتوافق أبداً انها تسيب ابنها او بنتها تحول بالمنظر ده ودايماً يطلبوا مني انهم يعملوا عملية عشان الحول المؤقت ده ما يظهرش عندهم تاني .. وانا فعلاً باعمل عمليات كتيرة جداً لأطفال عندهم حول متقطع رغم اني دايماً بأقول انه حول غير ضار على الاطلاق ..
" هو الحول ده ملوش علاج إلا العملية ؟ "
الحول الوحشي المتقطع لايمكن نمنعه من الظهور إلا بعمل العملية قولاً واحداً. النظارة والتمارين علاج مش مؤكد للحول المتقطع .. ساعات بتنفع عند الأطفال بس وساعات لأ.
" طيب نسبة نجاح العملية كام في المية ؟ "
نسبة نجاح عملية الحول المتقطع تقريباً 100% وفعلاً بعد العملية الحول ما بيظهرش أبداً.
" طيب ممكن يحصل مضاعفات من العملية ؟ "
حاجتين ممكن يحصلوا.. فيه عدد قليل من العيانين بيظهر عندهم حول انسي خفيف جداً بيروح بعد شهرين من العملية .. وفيه عدد قليل تاني ممكن يشوف ازدواج في الرؤية بعد العملية وبرضه بيروح بعد شوية
" صحيح الحول المتقطع ممكن يتحول الى حول دائم ومستمر ؟ "
ساعات قليلة الحول المتقطع بيتحول لحول دائم والعين تحول وماتتعدلش أبداً .. لكن ده بصراحة مش بيحصل مرة واحدة كده .. بيحصل بالتدريج .. تيجي الأم تقولي دلوقتي الحول بيظهر 50 مرة في اليوم .. وبعد فترة تقولي دلوقتي العين بتحول 100 مرة في اليوم .. وكده يعني
كل الاسئلة دي سألتها مامة عبد الرحمن بعد ماكشفت عليه في العيادة .. وعادي زي كل الامهات طلبت مني عمل العملية لابنها عشان الحول ده مايظهرش تاني ..
المهم .. عملت العملية لعبد الرحمن تاني يوم .. حمد الله على سلامتك يا عبده .. عمليتك نتيجتها ممتازة .. والف مبروك
د. جمــال صبـــحي
------------------------------
عنوان العيادة
*************************
د. جمال الدين احمد صبحي
رئيس قسم الحول
بالمعهد التذكاري للأبحاث الرمدية
*************************
القاهرة
ميدان روكسي
12 شارع بطرس غالي
الدور الثالث
*************************
يومياً ماعدا الخميس والجمعة
من 7 مساءً إلى 9 مساءً
*************************
سعر الكشف
200 جنيه
*********************
الحجز مسبقاً بالتليفون
01284555 717
01284555 720
01284555 740
02 24539687
*********************
ليست هناك تعليقات:
إرسال تعليق